Më 25 maj 2023, për herë të parë në Shqipëri, këngëtari i famshëm grek Nikos Vertis solli një natë të paharrueshme për të rinjtë e Tiranës, Shqipërisë dhe fansat e tij europianë, të cilët e ndjekin me përzemërsi në çdo koncert.
Koncerti në Tiranë ishte pjesë e turneut të tij ndërkombëtar të titulluar “20 Vjet Ritëm dhe Pasion”, dhe u zhvillua në stadiumin Air Albania, ku mijëra të pranishëm u bënë një me emocionin dhe zërin magjepsës të artistit.
Atmosfera ishte elektrizuese dhe emocionale, falë edhe mbështetjes kryesore të Birrës Bavaria dhe pijes energjike 8S2 , që e kthyen këtë natë në një festë të madhe muzikore.
Në kuadër të këtij turneu, Nikos Vertis ka performuar gjithashtu në Sofie, Jerevan, Beograd, si dhe në shumë qytete të Greqisë. Koncerti në Tiranë u konsiderua një nga momentet kulmore të Javës Kulturore Greke në Shqipëri, duke përforcuar lidhjet kulturore mes dy vendeve.
Nikos Vertis, i lindur në Gorinchem, Holandë, me origjinë nga fshati Galipsos, është një nga emrat më të dashur të muzikës greke. Ai interpretoi live hitet e tij më të njohura, i shoqëruar nga kori i spektatorëve që këndonin me të në çdo notë. Pjesëmarrja e publikut ishte e jashtëzakonshme, ndërsa në audiencë u panë edhe personalitete të jetës publike shqiptare.
Media shqiptare i kushtoi vëmendje të madhe këtij koncerti, duke e cilësuar një sukses të plotë për nga organizimi, efektet skenike dhe niveli profesional i gjithë performancës.
Deri më sot, Nikos Vertis ka publikuar pesë albume, një CD single dhe dy albume speciale në format CD/DVD, duke dëshmuar karrierën e tij të gjatë dhe të suksesshme në skenën muzikore.
